ALVAREZ BLAZQUEZ, XOSÉ MARÍA
Unha mañá do mes de maio de hai moitos anos coouse por debaixo da porta un airiño que recendía a rosas. O ar, que viña cantando, traía no colo unha nena acabada de nacer, a filla de María Luísa e mais de Xosé María, o seu home, e o escritor ao que se lle dedicou o Día das Letras Galegas en 2008.
Tanta graza lles fixeron aos pais, as cores da cara da meniña: o louro do cabelo, o azul intenso dos ollos, por non falar daquelas fazulas vermellas, que lle puxeron de nome Colorín. Alén diso, Xosé María escribiu unha serie de poemas para ela, que OQO Editora acaba de publicar nunha edición moi especial, con ilustracións da filla do poeta, a artista Berta Cáccamo.