MUÑOZ LOPETEGI, AMAIA / MARTÍNEZ ZABALETA, MAITE
Iktusa, haren prebalentzia eta ondorioak direla-eta, garrantzi handia duen gaixotasuna da, ez soilik osasungintzan, baita gizartean ere. Orain ez urte asko gaitz trataezina zen arren, aurrerapen izugarriak gertatu dira azken urteotan, iktus iskemikoaren alorrean bereziki. Errebaskularizaziorako tratamenduen agerpenak ezarri zuen lehenaren eta orainaren arteko muga, iktusari aurre egiteko itxaropena piztuz.
Tratamendu horiek, ordea, denborak mugatutako erabilgarritasuna dute, ordu gutxikoa. Hori dela-eta, ahalegin itzelak egin dira iktusaren arreta hobetu eta tratamenduen eraginkortasuna eta hedapena ahalik eta handiena izan daitezen. Iktus-kodea eta iktus-unitateen garapena dira adibide adierazgarrienak. Baina horretaz gainera, aurrerapen iraultzaileak ari gara ikusten iktus-prozesuaren alor guztietan: gizartearen kontzientziazioan, prebentzioan, diagnostiko eta tratamendu-teknika hobeen garapenean, zein errehabilitazioaren esparruan. Aspektu horiek guztiak ezagutzera ematera dago bideratuta liburu hau, bi neurologoren ikuspuntutik aztertuta.
